Ф.М.Капуцкі тлумачыць нюансы свайго досведу В.М.Хвалюку.
(Фота - дадатак да запісу ў блогу ад 11.01.10.)

13 студзеня на хімічным факультэце БДУ адбываўся эксперыментальны тур Мінскай гарадской хімічнай алімпіяды.

Заканчваецца трэці этап хімічнай алімпіяды, і сёння будуць аб'яўленыя вынікі.
Першы дзень у Мінску (тэарэтычны тур) праходзіў так:

Хто паверыць, што акадэміку Ф.М.Капуцкаму - ужо 80!

Фёдар Мікалаевіч доўгія гады як зам. дэкана і дэкан кіраваў хімічным факультэтам, заснаваў НДІ фізіка-хімічных праблем БДУ і стаў яго першым дырэктарам, быў Першым замміністра адукацыі, рэктарам БДУ. Ва ўсім свеце ён вядомы як лідэр навуковай школы, што паспяхова займаецца хіміяй цэлюлозы і яе вытворных.

Гэта Фёдар Мікалаевіч - аўтар бессмяротных фраз, якія ведае кожны выпускнік хімфака:

"Хочешь учиться - учись, поможем, стипендию дадим. Не хочешь учиться - отчислим!"

"Учиться вы не учились, замуж не вышли. Так что же вы делали пять лет в вузе?"

Фёдар Мікалаевіч як шматгадовы старшыня журы Рэспубліканскай хімічнай алімпіяды, як старшыня журы і сустаршыня аргкамітэта дзвюх Усесаюзных алімпіяд (1971 і 1990 гг.) многа сілаў уклаў у падмурак той алімпіяднай сістэмы, якой мы цяпер па праву ганарымся.

Зычым Фёдару Мікалаевічу моцнага здароўя, шчасця, новых навуковых перамог. Заставайцеся тым жа жыццялюбам, якім мы вас бачым, паважаем і любім!

Дацэнт, канд. хім. навук Дзмітры Генадзевіч Зайцаў шмат гадоў працаваў у складзе журы Мінскай гарадской і Рэспубліканскай алімпіяд, вёў заняткі з нацыянальнай зборнай, а даўней (1994-96 гг.) і сам быў алімпійцам.
Цяпер Дз.Г.Зайцаў займаецца фізхімічнымі праблемамі ў Ростаку (Германія).

Сёння мелі прыемную сустрэчу з Аляксандрам Статкевічам (бронзавы медаль 33-й Міжнароднай, 2001 г.).
Аляксандр - адзін з тых хімікаў-эколагаў, дзякуючы якім у раёне "Атланта" паветра заўсёды трымаецца чыстым і свежым.

Іосіф Цімкоўскі (залаты медаль Мендзялееўскай 2004 г., бронзавы Міжнароднай 2004 г.) толькі што закончыў МДУ. Цяпер ён вялікі спецыяліст у атмасфернай хіміі.
Зычым Іосіфу яшчэ большых поспехаў - у аспірантуры і пасля аспірантуры.

Сёння адбылося ўганараванне пераможцаў алімпіяд мінулага года, і ў рэпартажы СТВ мы з задавальненнем ўбачылі знаёмыя твары.

Сёння па дарозе на міжнародную канферэнцыю "Nanomeeting" да нас зайшоў Dr. rer. nat. Aleksander Gurlo (Дармштадзкі ўніверсітэт, Германія), г. зн. Аляксандр Часлававіч Гурло, пераможца Рэспубліканскай хімічнай алімпіяды 1988 года.

Прыемная публікацыя аб Багдану Ранішэнку з'явілася ў газеце "Гомельская праўда" (№71-72, 14 мая 2009).